Budapeşt Moskva ilə Kiyev arasında sülh danışıqlarına böyük ümid bəsləyir

Budapeşt, 12 mart, RİTOR.az

Ukraynadakı müharibəyə heç bir dövlət, xüsusən də Avropa laqeyd yanaşmır. Üstəlik, Ukrayna ilə ümumi sərhədi nəzərə alsaq, açıq şəkildə demək olar ki, bu müharibə ilə bağlı hər şey və ondan qaynaqlanan nəticələr birbaşa Macarıstanı da narahat edir.

RİTOR.az xəbər verir ki, Macarıstanın xarici işlər naziri Peter Siyarto bu barədə paylaşdığı məqalədə müharibənin artıq üç ildir davam etdiyini narahatlıqla xatırladıb.

“Üç ildir biz atəşkəs əldə olunmasına və sülh danışıqlarının başlanmasına çağırış edirik. Bu üç il ərzində mövqeyimizə görə bizi tənqid ediblər və budur, üç ildən sonra atəşkəs rejiminin əldə olunması və sülh danışıqlarının başlanmasına ümid yaranıb. Bəlkə bütün bu rüsvayçılığa ehtiyac yox idi?! O zaman yüz minlərlə insan həyatını itirməzdi, milyonlarla insan məcburi köçkün vəziyyətinə düşməzdi və dəymiş ziyanın həcmi hazırkından yüz milyardlarla avro daha az olardı”, – deyə Siyarto qəzəblə müharibəni davam etdirən və onu daha da alovlandıranların məsuliyyətsizliyinə eyham vurub.