Azərbaycan ABŞ-a yumurta ixracına başlayır

Bakı, 6 mart, RİTOR.az

Azərbaycan Quş Əti, Yumurta İstehsalçıları və İxracatçıları Assosiasiyası mart ayından Amerika Birləşmiş Ştatlarına müntəzəm süfrə yumurtası ixracına başlayır.

Assosiasiyanın ictimaiyyətlə əlaqələr və analitika departamentindən AZƏRTAC-a bildirilib ki, ötən ildən ABŞ-da quş qripinin yayılması ilə əlaqədar yumurta qıtlığı və qiymətlərin bahalaşması müşahidə olunmaqdadır.

ABŞ hökuməti bu prosesin qarşısını almaq üçün xarici ölkələrdən yumurta idxalına icazə verib. Azərbaycanın ən böyük quşçuluq təsərrüfatlarından biri olan “Giləzi Quşçuluq” ABŞ standartlarına uyğun sertifikatlaşdırmadan uğurla keçərək bu ölkəyə süfrə yumurtası ixracı icazəsi əldə edib.

“Bildiririk ki, ABŞ-a ixracın başlanması Azərbaycan daxilində yumurta təchizatı və qiymətlərə hər hansı təsir etməyəcək. Belə ki, hazırda Azərbaycanda süfrə yumurtasına olan gündəlik tələbat 4 milyona yaxındır. Faktiki istehsal isə 6 milyon civarındadır. Bu istehsalın az bir qismi xaricə ixrac olunsa da, daxili tələbatı artıqlaması ilə ödəyəcək sayda ölkədə qalır. Hazırda anbarlarda 100 milyon ədədə qədər yumurta var”, - deyə assosiasiyanın məlumatında bildirilir.